援交定社交？ (出自am730--港男達人)
前排電視播咗個關於時下少女援交嘅時事節目，內容都幾令人欷歔，細佬唔想扮衞道之士，講埋啲「少女貪慕虛榮，香港道德敗壞」嘅廢話，因為而家社會嘅價值觀，係由成年人建立，而且仲係跟嗰班有錢人操控嘅遊戲規則，我哋無權用簡單二分法，一口咬定援交賣淫係賤人，而選美去飯局凑老細就係叻女。兩種女人做嘅嘢其實一模一樣，分別只係一個上網，一個去飯局；一個收cash，一個收層樓啫！
節目訪問咗個援交嘅女大學生，佢重複表示，自己好清楚做緊乜，又覺得無影響他人，唔明點解會俾人指斥敗壞社會風氣，佢反指啲明星藝人，一樣日夜响電視販賣性感肉體，影響更大，點解又無人出嚟指責，仲有咁多傳媒報道，為呢啲人吶喊助威？
呢位妹妹說話毫不激動，反而有種無奈同難以理解心結，我心有啲難過，難過唔係佢要出嚟援交，而係佢真係一矢中的，講中咗我哋香港社會嘅扭曲價值觀：有錢有面嘅富豪，用銀紙買幾多個女人返嚟同佢生仔，記者仲幫佢錦上添花，日夜追訪名太用咩嘢名牌手袋，都唔敢批評半句貪慕虛榮；無錢花費嘅援交少女，傳媒就搶佔道德高地，以反映社會現實為名，將佢哋嘅原罪，同名牌手袋掛鈎！記者欺善怕惡，定仇貧戀富，大家有目共睹，無謂畫公仔畫出腸！
當電視廣告販賣住豪宅，戴名錶，名人食家都坐擁名模美女嘆世界，少女用天生本錢幹原始買賣，又敗壞到多少道德？唔少年輕才俊、暴發大款何嘗唔係用錢作誘餌，物色女朋友？友人的律師樓，新小秘書一上工，立刻主動獻殷勤，認識各大老闆自我介紹，並且明示暗示，尚未有男朋友，友人已婚，坦白告知身分，小秘書不介意不特止，還主動獻身，樂得有位律師part time男朋友。
真人真事，比援交更奇情，女秘書可能不只有一個男朋友，每人送件名貴禮物，管接管送，遊埠吃喝玩樂，好過死捱八千蚊一份工！這種交易關係係援交嗎？當然唔係，因為大家唔係上網識；算唔算賣淫？梗唔算，個女仔又無收現金，鋪鋪清，送手袋之嘛，大富豪都係咁溝女啦！咁有無犯賤？唓！無人吼嗰陣先叫賤，正傻女！唔捉麻鷹捉雞仔！家陣敗壞風氣啲人，全部有名有姓，响八卦周刋度搵到晒！警察同傳媒，要搞，搞呢啲男男女女，唔好恰班援交妹妹仔！
---------------------------------------------------------------------------------------------
我十分同意上述文章, 援交咁大鑊, 如果一味blame d妹妹仔呢樣果樣, 而又唔諗點解佢地會搞成咁, 不單只幫唔到d妹妹仔, 只會令佢地覺得d人唔明佢地, 覺得自己同d大人活在不同世界, 於是d妹妹仔就大條道理我行我素
話到頭來, 成日只係識吵吵鬧鬧既大人, 邊個真係想幫d女? 同埋再講衰d, 想幫d女果幾個, 又有幾多個夠班幫d女?
所以, 有時見到一d寸過碼頭苦力既女, 我估大家都明, 更加唔會問點解會咁
留言列表
